Mae John Fitzgerald Coyne, sydd â’r llysenw 'Fitzy', yn arbenigwr ar ddatblygu sgiliau a strategaethau masnachol ar gyfer busnesau modern. Wedi'i enwi ar ôl 35ain Arlywydd yr Unol Daleithiau, cafodd y fraint o weithio'n agos gyda'i chwaer, Eunice Kennedy Shriver, oedd yn eiriolwr dros faterion iechyd ac anabledd plant am flynyddoedd maith a sefydlodd y mudiad a ddaeth yn Gemau Olympaidd Arbennig.

Dechreuodd John ei yrfa yn sector twristiaeth Iwerddon ac ym 1991 daeth yn Gyfarwyddwr Masnachol cyntaf erioed CPD Lerpwl lle cafodd y dasg o ehangu agweddau ariannol, masnachol a datblygu busnes y clwb.

Ar ôl gadael CPD Lerpwl, treuliodd John beth amser yn Chwaraeon Cymru cyn symud i'r sector iechyd lle mae wedi aros i raddau helaeth ers hynny.

Yn fwyaf diweddar, John oedd Rheolwr Gyfarwyddwr SWFT Clinical Services Limited, Cwmni Teckal sy’n eiddo i’r GIG. Yma roedd yn rheoli trosiant o tua £50m y flwyddyn a 280 o staff.

Mae wedi ymddangos ar 'This is your Life' a 'Question Time' ac wedi cyfweld â Pierce Brosnan, Liam Neeson, Cecelia Ahern a Colin Farrell ar gyfer straeon i bapur newydd yr Irish Post, ac fe gyflwynodd unwaith i Arlywydd hyd yn oed!

 Mae John yn rhedwr brwd ac yn byw gyda'i wraig Lisa a'i ferch Darcy. Daeth yn Gyfarwyddwr Masnachol a Chaffael Llywodraeth Cymru ym mis Medi 2021.

Cafodd Rebecca Evans ei hethol i’r Cynulliad Cenedlaethol am y tro cyntaf ym mis Mai 2011, i gynrychioli rhanbarth Canolbarth a Gorllewin Cymru. Yn 2016, daeth hi'n Aelod Cynulliad ar gyfer Gŵyr.

Cafodd Rebecca radd mewn Hanes o Brifysgol Leeds, a gradd MPhil mewn Astudiaethau Hanesyddol o Goleg Sidney Sussex, Prifysgol Caergrawnt. Cyn cael ei hethol, bu Rebecca’n gweithio yn y trydydd sector.

Mae Rebecca wedi gwasanaethu ar y Pwyllgor Datblygu Cynaliadwy a’r Amgylchedd a’r Grŵp Gorchwyl a Gorffen ar gyfer y Polisi  Amaethyddol Cyffredin. Mae hi hefyd wedi gwasanaethu ar y Pwyllgor Iechyd a Gofal Cymdeithasol, a’r Pwyllgor Plant, Pobl Ifanc ac Addysg.

Ym mis Mehefin 2014, cafodd Rebecca ei phenodi’n Ddirprwy Weinidog Ffermio a Bwyd, ac ym mis Mai 2016 daeth yn Weinidog Gwasanaethau Cymdeithasol ac Iechyd y Cyhoedd. Ym mis Tachwedd 2017, cafodd ei phenodi’n Weinidog Tai ac Adfywio, ac ym mis Rhagfyr 2018, ymunodd â’r Cabinet fel y Gweinidog Cyllid a’r Trefnydd. Ar 13 Mai 2021 penodwyd Rebecca yn Weinidog Cyllid a Llywodraeth Leol.

Ymunodd Malcolm Harrison â’r Sefydliad Siartredig Prynu a Chyflenwi (CIPS) ym mis Gorffennaf 2018 ar ôl gyrfa eang ac amrywiol a oedd yn ymestyn dros 30 mlynedd. Ar ôl cael profiad o nifer o wahanol sectorau, ardaloedd daearyddol a swyddi arwain uwch, mae Malcolm yn teimlo’n angerddol mai Caffael a Chyflenwi yw’r prif wahaniaethydd ar gyfer unrhyw sefydliad.

Ar ddechrau ei yrfa, bu’n gweithio ym maes Cynhyrchu, Gwerthu, Caffael, Cadwyn Gyflenwi ac Adnoddau Dynol gyda Mars Confectionery, Pedigree Petfoods a Bass. O 2000 ymlaen, creodd ac arweiniodd ymgyrch Gaffael fyd-eang ar gyfer Interbrew yng Ngwlad Belg, a chafodd ei benodi wedyn yn Brif Swyddog Caffael InBev. Yn 2006, ymunodd Malcolm â Nestlé SA yn y Swistir fel Prif Swyddog Caffael a oedd yn gyfrifol am un o’r gwariannau caffael FMCG mwyaf a mwyaf cymhleth yn y byd; canolbwyntiodd o ddifrif ar feithrin gallu ac ysgogi ymgysylltiad y swyddogaeth gaffael â busnesau Nestlé. Yn 2010 cafodd ei benodi’n Brif Swyddog Gweithredol yr adran fyd-eang ar Becynnu Plastig, a daeth yn aelod o Bwyllgor Gweithredol Rexam plc, sef cwmni pecynnu defnyddwyr FTSE 100.

O 2015 ymlaen, bu Malcolm yn gweithio yn Swyddfa Cabinet Llywodraeth y DU lle bu’n Brif Swyddog Gweithredol Gwasanaeth Masnachol y Goron (CCS), gan oruchwylio gwariant blynyddol o dros £13 biliwn ar nwyddau a gwasanaethau cyffredin ar draws sector cyhoeddus y DU. Roedd hefyd yn gyfrifol am Bolisi Caffael Sector Cyhoeddus y DU ac am gefnogi mentrau Llywodraeth y DU gyda busnesau bach a chanolig.

Ar ôl sefydlu a datblygu nifer o swyddogaethau Caffael dros gyfnod ei yrfa, mae Malcolm yn awyddus i CIPS lywio’r proffesiwn yn ei flaen, gan roi dysgu proffesiynol parhaus wrth galon yr agenda ar gyfer gweithwyr proffesiynol ym maes caffael a chyflenwi. Mae sicrhau bod CIPS yn parhau i fod yn llais byd-eang i’r proffesiwn yn hanfodol i weledigaeth Malcolm ar gyfer CIPS yn y dyfodol, gan helpu i sicrhau bod CIPS yn gallu parhau i gynrychioli’r proffesiwn ar y lefelau uchaf a hyrwyddo Caffael a Chyflenwi fel gyrfa wych.

Mae gan Malcolm Radd Meistr mewn Peirianneg Gemegol o Brifysgol Caergrawnt. Mae’n byw yn y DU ac mae wedi treulio dros 12 mlynedd i gyd yn byw yng Ngorllewin Affrica, Ffrainc, Gwlad Belg a’r Swistir Fel rhan o’i yrfa

Cyfarwyddwr, Gwasanaeth Caffael

Dechreuodd Jonathan fel Cyfarwyddwr Caffael a Gwasanaethau Negesydd Iechyd ym mis Medi 2019.

Mae gan Jonathan brofiad helaeth o arwain ym maes caffael ar lefel genedlaethol o’i gyfnod yn y Sefydliad Gwasanaethau Busnes, y Gwasanaeth Caffael a Logisteg yng Ngogledd Iwerddon, lle bu’n ymwneud â gweithredu a datblygu gwasanaeth caffael a logisteg ar y cyd ar gyfer Iechyd a Gofal Cymdeithasol ar draws y wlad. 

Yn fwyaf diweddar, mae wedi arwain y swyddogaeth Gwasanaethau Caffael ar gyfer un o’r Ymddiriedolaethau acíwt mwyaf yn Lloegr, Ymddiriedolaeth GIG Ysbytai Athrofaol Nottingham, lle cyflwynodd raglenni lleihau costau sylweddol a chyflwynodd ddulliau caffael arloesol sy’n seiliedig ar werth gan ganolbwyntio ar ganlyniadau cleifion.

Bydd yn defnyddio ei brofiad i ddatblygu’r ffordd “Unwaith i Gymru” o gaffael yn y GIG a sicrhau bod y genedl yn harneisio ac yn defnyddio ei phŵer a’i dylanwad prynu ar y cyd i ddarparu cynnyrch, gwasanaethau a systemau gofal iechyd sy’n cynnig gwerth am arian ar gyfer cleifion Cymru. Bydd Jonathan yn sicrhau bod y Gwasanaethau Caffael hefyd yn parhau i gefnogi Byrddau Iechyd a’r holl bartneriaid allanol i ddarparu gwasanaethau cost effeithiol ac effeithlon i gefnogi cleifion yn eu hardal leol.

Y tu allan i’r gwaith, mae Jonathan yn rhedwr clwb brwd ar y ffordd a thraws gwlad, ar ôl ymuno â Rhedwyr Penarth a Dinas i ddal ati i gymryd rhan yn y gamp y mae’n ei mwynhau.

Mae Jonathan yn awyddus i sicrhau y gall wneud cyfraniad cadarnhaol a pharhaol i GIG Cymru ac i gleifion yn y blynyddoedd i ddod.